Радиотерапиялык жабдууларды тейлөөгө 18 миллион сом бөлүнөт
27-июлда Саламаттык сактоо министри Дамир Осмонов Индиянын Кыргызстандагы Атайын жана Ыйгарым укуктуу Элчиси Бирендер Сингх Ядав менен биргеликте Улуттук онкология жана гематология борборуна барып, анда “Бабатрон” аралыктан нур менен дарылоо аппараты үчүн жаңы Кобальт-60 радиоактивдүү булагын расмий тапшыруу аземи болуп өттү. Бул тууралуу аталган министрликтен билдиришти.
Маалыматка караганда, жаңы булактын тапшырылышы жабдуунун үзгүлтүксүз иштешин камсыз кылууга жана онкологиялык оорулар менен жабыркаган бейтаптар үчүн өтө маанилүү болгон нур терапиясынын жеткиликтүүлүгүн сактоого мүмкүндүк берет. Бул демилге Кыргызстан менен Индиянын саламаттык сактоо тармагындагы кызматташтыгынын кезектеги практикалык жыйынтыгы болуп саналат. Саламаттык сактоо министрлиги мурда белгилегендей, Индия менен кызматташтык онкологияны өнүктүрүүнү, медициналык кадрларды даярдоону, заманбап технологияларды киргизүүнү жана медициналык инфраструктураны жаңылоону камтыйт.
Сызыктуу ылдамдаткычтарды оңдоо үчүн республикалык бюджеттен 4 миллион сом, ал эми зарыл болгон запастык бөлүктөрдү сатып алууга 31 миллион сом бөлүндү. Мындан тышкары, 2027-жылдан баштап радиотерапиялык жабдуулардын баарын тейлөөгө жыл сайын болжол менен 18 миллион сом каражат бөлүү пландаштырылууда. Бул жабдууларды өз убагында тейлөөгө жана ар кандай техникалык мүчүлүштүктөрдү ыкчам жоюуга шарт түзөт.
