Бишкекте калктын көгүлтүр отко өтүүсү көмүрдү керектөөнү 100 миң тоннага кыскартты
Жаратылыш ресурстары, экология жана техникалык көзөмөл министрлигинде 2026-жылдын биринчи жарым жылдыгынын жыйынтыгы боюнча коллегиялык жыйын өтүп жатат. Бул тууралуу министрликтин басма сөз кызматы билдирди.
Маалыматка ылайык, жыйында министрликтин жана түзүмдүк бөлүмдөрүнүн алты ай ичинде аткарган иштери талданып жатат.
Коллегиянын жүрүшүндө абанын сапатын жакшыртуу багытында жүргүзүлүп жаткан иштерге өзгөчө көңүл бурулду.
Белгиленгендей, калкты газ менен камсыз кылуунун жеткиликтүүлүгүн жогорулатуу максатында Министрлер Кабинети 20-апрелде тескеме кабыл алган.
Аталган чечимдин негизинде жарандарга жаратылыш газына өтүү үчүн 150 миң сомго чейинки өлчөмдө 3%дык чен менен жеңилдетилген насыялар бериле баштады. Буга чейин мындай насыялардын пайыздык чени 8%ды түзгөн.
Бүгүнкү күндө борбор калаада 54 калктуу конуш, 54 127 абонент көгүлтүр от тармагына кошулган. Алардын ичинен 33 миң үйдүн жылытуу тутуму көмүрдөн газга өткөн.
Аталган иштердин натыйжасында көмүрдүн орточо жылдык керектөөсү болжол менен 100 миң тоннага кыскарганы белгиленди. Бул көрсөткүч абанын сапатын жакшыртууга жана экологиялык абалды турукташтырууга багытталган маанилүү кадамдардын бири болуп саналат.
