Ипподром аймагында жана Пригородный конушунун жанында ири турак жай комплекси курулат
Кечээ Бишкек мэри Айбек Жунушалиев 2050-жылдарга чейин Бишкек шаарынын башкы планы боюнча маалымат берип жатып “Ишкер медиа” сайтынын башкы план долбоорундагы веложолдор системасы жана жаңы конуштарды ренновация кылуу боюнча суроолорго жооп берди.
Мэрдин айтымында, буга чейин бул маселени экологдор байма-бай көтөрүп келишкендиктен веложолдор системасы да шаардын жаңы башкы планында эске алынган. “Бизде веложолдор шаар боюнча бир тутум катары каралып келген. Азыркы башкы планда жашыл түс менен велосипедчилер үчүн атайын бир схема көрсөтүлгөн. Ошондуктан коомдук транспортко альтернативдүү транспорт түрлөрү сөзсүз эске алынып жатат десек болот. Шаардык туругундар веожолдор схемасын өздөрү ыңгайлуубу, ыңгайсызбы карап, анализ кылышса болот”,-дейт ал.
Жаңы конуштардын реновациясы боюнча айтып жатып, мэр Бишкек шаарынын административдик-аймактык реформасынан кийин шаарды айланта 100дөн ашык жаңы конуштар болуп калганын айтты. “Албетте ал үйлөрдө эл көп мезгилдер бою жашап, бардык тиешелүү документтери болгондуктан алар өзгөртүлбөйт. Бирок, биз шаарды горизонталдык эле эмес, вертикалдык жактан өстүрүүгө да маани беришибиз керек. Азыр президентибиздин саясатынын алкагында ипотекалык көп кабаттуу үйлөр курулуп жатат. Келечекте ипподромдо въетнамдык инвесторлордун жардамы менен көп кабаттуу ири турак жай комплекси, андан сырткары Пригродный жакта да 234 гектар жерде турак жай комплекси курулат”,-дейт калаа башчысы.
Мэрдин айтымында, Пригородный жактагы жерге нормага ылайык 5 кабаттуу гана үйлөр тургузулат. Ипподром жакта нормага туура келсе 30 кабаттан төмөн көп кабаттуу үйлөрдү куруу пландалып жатат.
