Бишкекте 35 жана 40 кабаттуу 14 турак үйдүн курулушу башталды
Бишкек шаарында жаңы муундагы ири көп функционалдуу турак жай комплексинин курулушу башталганын Мамлекеттик ипотекалык компаниядан билдиришти. Маалыматка ылайык, Достоевский көчөсүндө салынып баштаган турак жай комплексинин жалпы аянты 13,55 гектарды ээлейт.
Турак жай комплекси 14 блоктон турат:
- 35 кабаттуу 10 турак үй,
- 40 кабаттуу 4 турак үй.
Батирлердин жалпы фонду – 4 160.
- 1 бөлмөлүү — 1 520 батир,
- 2 бөлмөлүү — 2 400 батир,
- 3 бөлмөлүү — 240 батир.
Бул имараттар Кыргызстанда алгачкы жолу курулуп жаткан эң бийик көп кабаттуу турак жай. Долбоорду Мамлекеттик ипотекалык компания ишке ашырууда.
Ар бир блоктун биринчи үч кабатында жана блоктордун ортосунда өзүнчө далистери бар коммерциялык жайлар каралган.
Комплексте 3 деңгээлдүү, 4 200 унаага ылайыкташкан жер алдындагы паркинг куруу пландалган. Бул унаа токтотуучу жай Кыргызстандагы эң ири автопаркингдердин бири болот. Ошондой эле өрт коопсуздугу үчүн атайын өтмөлөр жана кошумча жер үстүндөгү унаа токтоочу жай да болот.
Турак жай комплексинин аймагында жашоочулар үчүн бассейни бар заманбап спорт борбору, балдар аянтчалары, теннис корттору, баскетбол жана кичи-футбол талаасы жайгашат.
Социалдык инфраструктураны өнүктүрүү максатында 750 орундуу мектеп, 280 балага ылайыкташкан бала бакча да курулат.
Курулуш, архитектура жана турак жай-коммуналдык чарба министри Нурдан Орунтаев белгилегендей, комплекс толугу менен сейсмикалык туруктуулук талаптарына жооп берет.
