"Мурас" турак жай комплексинде жыл аягына чейин 1080 батир пайдаланууга берилет
Кечээ президенттин Иш башкармалыгынын башчысы Каныбек Туманбаев Мамлекеттик ипотекалык компания куруп жаткан “Мурас” турак жай комплексиндеги иштер менен таанышканын компаниядан билдиришти.
Маалыматка ылайык, мурда бүткөрүлгөн иштердин биринчи этабында 986 батир пайдаланууга берилип, аларда тургундар жашап жатат.
Каныбек Туманбаев ушул жылдын аягына чейин дагы 1080 батирди толук бүтүрүп, жакын арада пайдаланууга берүү пландалып жатканын айтты. Бул мамлекеттик ипотека аркылуу үй күтүп жаткан жарандар үчүн чоң колдоо болуп саналат.
Ошондой эле ал комплекстеги калган блокторду келерки жылдын аягына чейин толук бүткөрүү мерчемделгенин баса белгиледи. Натыйжада “Мурас” мамлекеттик ипотекалык турак жай комплексинде жалпы 4 754 батир курулат.
Мындан тышкары, ал комплекстин аймагында орнотулган европалык заманбап автономдук откананы өзүнчө белгиледи. Бул Кыргызстанда сейрек колдонулган, энергияны үнөмдөгөн, коопсуз жана туруктуу жылытуу берген жогорку технологиядагы система.
