Н.Орунтаев: "Кыргызстан курулуштарында 500-маркадагы гана арматура колдонулат".

Курулуш, архитектура жана турак жай-коммуналдык чарба министри Нурдан Орунтаев бүгүн “Элден собол” берүүсүнүн түз эфиринде сүйлөп жатып өлкө аймагында жүрүп жаткан бардык курулуштардын сапатына кепилдик бере аларын билдирди.

Анын айтымында, ар бир курулуш объектиси долбоорлоо этабынан башталат. Алгач долбоору даярдалып, тиешелүү макулдашуулардан жана экспертиза органдарынан өтөт. Андан кийин гана мамлекеттик реестрге катталып, курулуш иштери башталат.

“Реестрге катталган ар бир объектке министрликтин өкүлдөрү бекитилет. Алар курулуштун бардык этабын көзөмөлдөп, туруктуу түрдө текшерип турушат. Эгер кандайдыр бир мыйзам бузуу же кемчилик аныкталса, айып пул салынып, бузуу жана кайра куруу талап кылынат. Курулуштун ар бир этабы көзөмөлдө турат. Бүгүнкү күндө курулуштардын сапаты жогору деп ишенимдүү айта алам”, - деди министр.

Министр курулуш иштериндеги арматуранын сапатына да токтолду. Ал белгилегендей, Кыргызстанда арматуранын 500-маркадагы түрү гана колдонулат.

"Мындан тышкары Кыргызстан сейсмикалык активдүү аймакта болгондуктан ар бир курулуш объектилери 8-9 баллга чейинки жер титирөөгө туруктуу болуп курулууда”,-деп белгиледи ал.