Меккеде кыргызстандык зыяратчылар үчүн акысыз мейманкана курула баштады
Мекке шаарында Кыргызстандын жарандары үчүн акысыз мейманкана куруу иштери башталганын жана ал жерде зыяратчылар жана студенттер жайгаша алышарын Президенттик администрациянын маалыматтык саясат кызматынын жетекчиси Дайырбек Орунбеков билдирди.
Анын айтымында, долбоорду ишке ашыруу президент Садыр Жапаровдун колдоосу менен жүргүзүлүп жатат. Жаңы имарат Сауд Арабиясына келген кыргызстандыктардын, анын ичинде ажылык сапарга баргандардын жана билим алуу максатында барган жарандардын акысыз жашоосу үчүн арналат.
Ошол эле учурда курулуштун аяктоо мөөнөтү, каржылоонун көлөмү жана объектти пайдаланууга берүүнүн күнү азырынча тактала элек.
Учурда тиешелүү мамлекеттик органдар тарабынан мейманкананы андан ары башкаруу жана жайгаштыруу тартиби боюнча расмий комментарийлер берилген жок.
