Чатырында тикучак коно турган 25 кабаттуу бизнес-борбор курулат
Бишкек шаарынын борборунда “Кыргызстан аэропорттору” ААК "Авиатор" аттуу жаңы, технологиялык жана креативдүү, 25 кабаттан турган бизнес-борбор курууну пландап жатат.
“Авиатор” учуу, динамика жана жогорку технологиялар темасын чагылдырган дизайнердик чечимдер менен авиациялык стилде аткарылат. Комплекстин ичинде ишкерлер, стартаптар жана креативдүү индустрия өкүлдөрү үчүн бизнес аянтча, кеңсе, ресторан, бутик, отель жана башка заманбап мейкиндиктер жайгашат.
Долбоордун негизги өзгөчөлүктөрүнүн бири — 25 кабаттуу имараттын чатырында тик учак конуучу аянтчанын болушу. Бул чечим борбордун концепциясын гана эмес, анын премиалдык сервиске жана жогорку мобилдүүлүккө багытталгандыгын айкын көрсөтүп турат.
“Asman Airlines” авиакомпаниясынын (“Кыргызстан аэропорттору” ААКтын туунду түзүмү) Бишкек шаарынын аймагында жана ага жакын райондордо эс алуу жана ишкердик багыттардагы тик учак каттамдарын жүзөгө ашыруусу мерчемделүүдө. Компания бул максаттарда жакын аранын ичинде тик учак сатып алууну көздөп жатат.
“Авиатор” долбоору бизнес өкүлдөрүн, инвесторлорду жана борбор калаанын конокторун өзүнө тарта турган жаңы борборго айланып, инновацияларга ачык, заманбап жана дымактуу Бишкектин символу болууну көздөйт", — деп белгиледи “Кыргызстан аэропорттору” ААК башкармалыгынын төрагасы Манасбек Самидинов.
