Байтиктин Боз-Бөлтөгү "желип" баратат
Соцтармактарда дрон менен тартылган жаңы видео тарады. Анда тоонун капталын тилген ири карьерлер, топурак менен кумдун үймөлөрү жана дээрлик кыр чокусуна чейин жеткен техника так көрүнөт. Колдонуучулар тоо дээрлик жок болуп баратканын жазып, ал дагы канча жылга жетерин суроо кылышууда.
Боз-Бөлтөк — борбор калаанын айланасындагы эң таанымал тоо массивдеринин бири. Ал "Орто-Сай" конушунун үстүндө жайгашкан. Дал ушул жерде советтик сүрөтчү Семен Чуйков өзүнүн белгилүү "Советтик Кыргызстан кызы" аттуу картинасын жараткан. Сүрөттөгү фон катары тартылган тоолор Бишкектин символдорунун бирине айланган.
Экологиялык ecomap.kg долбоорунун маалыматына ылайык, учурда тоонун капталдарында инерттик материалдарды казуудан улам Кызыл китепке кирген сейрек флора жана фауна түрлөрүнүн жок кылынышы катталууда.
Буга чейин жергиликтүү тургундар жана активисттер Боз-Бөлтөктү ыйык жана тарыхый мааниге ээ аймак катары коргоо маселесин көтөрүп келишкен. Жанындагы чокуларда флагштоктор жана эстелик белгилер орнотулган, бул жерге туристтер жана шаар тургундары чыгып турушат. Тоолор борбордун панорамасынын маанилүү бөлүгү катары каралат.
2022-жылдын 25-апрелинде президент Садыр Жапаров Боз-Бөлтөк тоосуна археологиялык-тарыхый корук макамын берүү тууралуу жарлыкка кол койгон.
