Аймактагы ишкерлер билимге муктаж – JIA
Зарема Урдөөлөтова 2003-жылдан бери кийим тигүү жаатында иш алып барат. Алгач Бишкек шаарында баштап, кийинчерээк Ысык-Көлгө көчүп кеткен. Ошондой эле ал аймакта иш алып баруу оңой эмес экенин айтат.
«Бул жерде шаардагыдай тытынып иштешпейт. Тигүүчүлөр турбайт, дайыма келип-кете беришет. Заказчиктерди табуу да кыйын. Көп учурларда ишим үзгүлтүккө учурап, отуруп калган убактар да болду», – дейт ал.
Кийим тигүү цехинде учурда 4 жумушчу иштейт. Ишкананын продукциясы ички рынокто сатылат. Пандемия учурунда иш дээрлик токтоп калган. Бизнестеги насаатчылык программасына кошулгандан бери иши кайра жанданганын айтат.
«Фейсбуктан «менти-ментор» деген программаны көрүп калып, арыз жөнөтүп койгом. Өтүп кетиптирмин. Бул тажрыйбасы жок ишкерлер үчүн сонун долбоор экен. Мен эң негизгиси, билимге муктаж болчумун. Онлайн окуулардан сонун нерселерди үйрөндүм, мыкты устаттар менен таанышып, алардын сабактарын азыр да интернеттен таап дайыма угуп турам».
Бул долбоордун алкагында ишкер айым чийки зат үчүн чакан каражат алган. Ошонун аркасы менен пандемия учурунда калган төрт тигүүчүсүн кармап калган экен. Учурда беткап тигип башташкан.
«Жаңы ишкерлик менен алектенип жаткан айымдарга менти-ментор программасы абдан маанилүү. Эң эле жөнөкөй нерселер башында аларга чоң тоскооолдук болуп калышы мүмкүн. Кантип баштоо керек, сырьену кайдан алса болот, канча каражат менен баштоо керек, кантип сатса болот ж.б. А менторлор болсо жеке ишкерлик жаатында аз болсо да тажрыйбасы бар, ушундай баштапкы этаптан өткөн ишкерлер, ошол жагынан жардам берип, суроолорго жооп бере алышат» – дейт Зарема Урдөөлөтованын устаты Нуржан Казакбаева.
Устат-шакирт алты ай бою онлайн байланыш аркылуу насаатчылык программасынын алкагында кызматташып келишкен. Нуржан Казакбаева 3 жылдан бери текстиль жаатында ишкердик кылат. Бул программанын артыкчылыгы, менти гана эмес, ментор да көп нерсеге үйрөнөт экен дейт.
«Негизи менти-ментор программасында ментиге гана үйрөтпөстөн, ментор да көп нерсеге үйрөнө алат, бири-бири менен алака түзүүдө эки тарап тең көп нерселерди үйрөнүшөт. Ошондуктан ишкерлер ортосунда пикир алмашуу боюнча иш чаралар көп болсо, өз ара тажрыйба алмашып, үйрөнүп, ишкерлерге көп жеңилдик болмок».
Соңку учурларда региондордо жеке ишкердик менен алектенгендер жылдан жылга көбөйүп жатканын айтат Нуржан Казакбаева. Көп адамдар колунан келген ишин бизнеске айлантуунун аракетин көрүп келишет. Бирок, аймактык ишкерлер үчүн заманбап билимдерге, жаңы маалыматтарга жеткиликтүүлүк боюнча маселелер бар. Насаатчылык долбоору так ошол кемчиликти толтуруу максатында ишке ашырылууда.
«Мага бул программада жетишпей турган бир гана нерсе болду – жандуу жолугушуулар. Негизи, жеринен келип жолугуп, бизнесибизди өз көздөрү менен көрүп, бетме-бет кеңештерин угуп, жандуу жолуксак мындан да эффективдүү болмок деп ойлойм. Бирок келечекте бул боюнча да планда бар деп айтып жатышат».
- Ишкердик жаатындагы насаатчылык программасы JIA бизнес ассоциациясы тарабынан ишке ашырылып жатат. Долбоорго БУУӨП каржылык колдоо көрсөтүүдө. Нарын, Ысык-Көл, Жалал-Абад жана Ош аймактарынан тартылган 12 ишкер айымга тажрыйбалуу ишкерлер тандалып, алар алты ай бою ментордук кылып келишти. Долбоор ноябрь айында жыйынтыкталат.
