Кыргыз геологиялык кызматы менен көмүр компаниялары кышкы даярдыкты талкуулашты
Жаратылыш ресурстары, экология жана техникалык көзөмөл министрлигинде Кыргыз геологиялык кызматы менен өлкөдөгү ири көмүр казып алуучу ишканалардын өкүлдөрү жолугушуу өткөрүштү. Бул тууралуу Министрликтин маалымат кызматынан билдиришти.
Жолугушууга Геологиялык кызматтын директорунун орун басары А.Ж. Курманалиев, жер казынасын иштетүү башкармалыгынын начальниги А.С. Сакимбаев жана көмүр тармагындагы негизги ишканалардын жетекчилери катышты.
Талкуунун жүрүшүндө көмүр кендерин иштетүүдө жаралып жаткан актуалдуу маселелер жана күз-кышкы мезгилине даярдык чаралары каралды. Геологиялык кызматтын жетекчилиги көмүрдүн баасын турукташтыруу жана калкты отун менен үзгүлтүксүз камсыз кылуунун маанисин баса белгиледи.
Тараптар жылытуу сезонуна байланыштуу көмүр өндүрүүнү күчөтүү зарылдыгын белгилешип, мындан аркы кызматташтыкты улантууга даяр экендиктерин билдиришти.
