Landesbank 20-сентябрдан баштап Европадан сыртка евро менен SWIFT-которууларын токтотот — КРда ал менен 11 банк иштейт
Немец корреспондент-банкы Landesbank Baden-Wuerttemberg атамекендик финансы-кредиттик мекемелерге 20-сентябрдан баштап банктын саясатынын өзгөргөнүнө байланыштуу евро түрүндөгү SWIFT-которуулар Европалык экономикалык зонадагы* өлкөлөрдүн жөнөтүүчүлөрүнөн жана Швейцария жана Улуу Британиядан гана аткарыла турганын билдирди. Бул евро менен төлөмдөр мындан ары аталган өлкөлөрдөн тышкаркы мамлекеттерге жеткиликтүү болбой калат дегенди билдирет.
Белгилей кетсек, Landesbank КРнын коммерциялык банктарынын арасында евро менен төлөмдөрдү жүргүзүү боюнча эң көп талапка ээ корреспондент-банктардын бири. Буга ылайык, 20-сентябрдан тарта күчүнө кире турган өзгөртүүлөр Кыргызстандын банк секторундагы кардарлардын таасирдүү бөлүгү үчүн евродо SWIFT-которууларды жөнөтүү жана алуу мүмкүнчүлүгүн чектейт.
Economist.kg финансылык басылмасынын редакциясы Кыргызстандагы 22 банктын төлөм документтерин жана расмий реквизиттерин талдап, алардын кайсынысынын Landesbankта корреспонденттик эсептери бар, кайсылары евро менен транзакцияларды жүргүзүүдө жарым-жартылай көйгөйлөргө туш болоорун же төлөмдөрдү толугу менен токтоторун талдады.
Чектөөлөргө тиешеси жок банктар
Жогоруда айтылган чектөөлөр таасир этпеген Кыргызстандагы банктар: "Айыл Банк", "Бай-Түшүм", "Евразия сактык банкы", "Капитал Банк", "Керемет Банк", "Кыргызкоммерцбанк", "Кыргыз-Швейцария Банкы", "Толубай", "ФинансКредитБанк", "ЭкоИсламикБанк", ошондой эле "Аманбанк". Анткени мындай маалыматтар уюмдун расмий сайтында жок.
"Толубай" АКБда евро менен SWIFT-төлөмдөрүн жүргүзгөн банк-корреспонденттер жок. Жогоруда саналган калган финансы институттары евро менен операцияларды жүргүзүү үчүн альтернативдик корреспондент-банктардын кызматын колдонушат.
Landesbank уюмунда корреспонденттик эсептери бар КРнын банктары
Landesbank банк-корреспондент катары иштешкен финансы мекемелеринин тизмесинде Кыргызстандан 11 банк көрсөтүлгөн. Алардын арасында: "Бакай Банк", "Азия Банкы", "Компаньон Банк", "Демир Кыргыз Интернэшнл Банкы", "Дос-Кредобанк", "Кыргызстан Коммерциялык Банкы" (МБАНК), "Кыргыз Инвестициялык Кредит Банкы" ( KICB), "Оптима Банк", "РСК Банк", "Финка Банк" жана [2022-жылдын маалыматтары боюнча] "Халык Банк Кыргызстан" бар.
Ошол эле учурда, жогоруда саналып өткөн айрым уюмдар Landesbank Baden-Wuerttemberg менен гана эмес, SWIFT-төлөмдөрүн евродо жүргүзгөн дүйнөнүн башка банктары менен да корреспонденттик мамилелерди түзүшкөн.
SWIFT-төлөмдөрүн евро менен оңой жүргүзүүгө мүмкүндүк берген альтернативдүү корреспонденттик эсептер: "Бакай Банк", "Демир Кыргыз Интернэшнл Банк", "Дос-Кредобанк", "Оптима Банк", "РСК Банк", "Халык Банк Кыргызстан", ошондой эле KICB жана MBANK банктарында бар.
Евро транзакциялары боюнча жалгыз эле корреспондент-банк катары Landesbank менен "Азия Банкы", "Компаньон Банкы" жана "Финка Банк" финансы институттары иштешишет.
Учурдагы кырдаалга байланыштуу Landesbank менен кызматташкан КРнын көпчүлүк банктарынын пресс-кызматтары кардарларга расмий веб-сайттарында күчүнө кирген өзгөртүүлөр жөнүндө кабарлашты. Республиканын альтернативдик корреспонденттик эсептери бар финансы-кредиттик уюмдары кыргызстандыктарды Европалык экономикалык зонанын чегинен тышкары жайгашкан өнөктөштөргө, ошондой эле Улуу Британия менен Швейцарияга евродо которууларды учурдагы реквизиттери тууралуу маалымат берүүгө чакырды.
Ал эми КРдагы евродо SWIFT-төлөмдөрү менен транзакцияларды жүргүзүүнүн жалгыз инструменти Landesbank болуп саналган банктар кардарларга чет өлкөдө операцияларды пландаштырууда кырдаалды эске алууну жана финансылык операцияларды доллар же башка жеткиликтүү валюталарда жүргүзүүнү сунушташты. Алар ошондой эле ийгиликтүү төлөмдөр үчүн дүйнөнүн башка банктары менен кошумча корреспонденттик мамилелерди түзүүгө аракет кылууга убада беришти.
*Маалымат: Европалык экономикалык зонага Австрия, Бельгия, Болгария, Венгрия, Гваделупа, Германия, Греция, Дания, Ирландия, Исландия, Испания, Италия, Кипр, Литва, Лихтенштейн, Люксембург, Мальта, Мартиника, Нидерланды, Норвегия, Польша, Португалия, Реюньон, Румыния, Словакия, Словения, Финляндия, Франция, Француз Гвианасы, Хорватия, Чехия, Швеция жана Эстония өлкөлөрү кирет.
Ишкер Media
