Тамактануу жайларында кызмат көрсөтүүлөр үчүн төлөм алууга тыюу салынат
2026-жылдын 1-январынан тарта ресторан, кафе жана башка коомдук тамактануу жайларында буйрутма берилген тамак баасынан сырткары кызмат көрсөтүү төлөмүн алууга тыюу салынат. Мындай токтом Министрлер Кабинети тарабынан кабыл алынды.
Документке ылайык, бардык кызматтар эми аштизимдеги тамак баасынын ичинде болушу керек. Тагыраагы, акыркы төлөм аштизимде көрсөтүлгөн баадан айырмаланбайт.
Коомдук тамактануу жайларына көрсөтүлгөн мөөнөткө чейин аштизимди, кассалык жана программалык чечимдерди талапка шайкеш келтирип, бардык кызмат көсөтүүлөр үчүн алынчу пайыздарды жоюу сунушталды.
Эске салсак буга чейин Экономика жана коммерция министрлиги кошумча төлөмгө тыюу салуу демилгесин көтөргөн. Ошондой эле коомчулук да ашы төлөм төлөөгө каршы экендигин буга чейин билдирип келген. Эми жаңы тартипке ылайык тамактануучулар буйрутма бергенге чейин эле тамактын так баасын билүүгө укуктуу. Бул карапайым адамдардын тамактануу жайларындагы акыркы төлөмгө карата нааразычылыгын азайтат.
