Жалал-Абад облусунда күн панелинин жардамы менен ичүүчү таза суу чыгарылды
Жалал-Абад облусунун Арал айылынын Майда-Мундуз тилкесинде алгачкы жолу күн панелдеринин жардамы менен иштеген ичүүчү таза суу чыгаруу системасы орнотулганын облустагы президенттин өкүлчүлүгү “Кабар” маалымат агентигине билдирди.
Президенттин облустагы өкүлчүлүгү маалымдагандай, долбоор 2025-жылдын июль айында башталып, Жалал-Абад облустук өнүктүрүү фонду тарабынан каржыланган. Ага жалпы 6 млн 833 миң сом каражат жумшалып, натыйжада 300 кожолук таза суу менен камсыз болгон.
Иш-чаранын жүрүшүндө облус жетекчиси Тилек Текебаев аталган долбоор “жашыл энергияны” колдонуу менен таза суу ресурстарын натыйжалуу пайдалануунун артыкчылыктуу үлгүсү экенин белгиледи.
Ошондой эле ал бүгүнкү күндө Жалал-Абад облусу боюнча 32 айыл жана 3 шаарда таза суу долбоорлору ишке ашырылып жатканын кошумчалады. 2025-жылдын 9 айынын жыйынтыгында алардын ичинен 5 айылда иштер толук аяктап, эл ичүүчү таза суу менен камсыз болгон.
