Никелешүү күбөлүгү санарипттик жана кагаз түрүндө берилет
“Кызмат” мамлекеттик мекемеси ЖМКларга Жарандык акыбалды каттоо актысын берүүчү мекеме (ЗАГС) тарабынан берилүүчү жаңы санариптик жана типографиялык күбөлүктөрдү тааныштырды. Эми эки түрдөгү бланк болот: санарип жана кагаз. Бул — Кыргызстандагы мамлекеттик кызматтарды санарип документтерге өткөрүү боюнча кийинки этап.
“Кызмат” ММнин директорунун орун басары Эрнес Досалиевдин айтымында, бул —бардык жарандык абал актыларын жеңилдетилген тартипте алуу үчүн мамлекет жүргүзүп жаткан жаңы саясат. Эми бул документтерди “Түндүк” порталындагы санарип форматта пайдаланса болот.
“Жаңы бланктар — санариптештирүү жолундагы маанилүү кадам. Бул мамлекеттик кызматтарды алууну жөнөкөйлөтүүнү көздөйт. Министрлер кабинетинин 2025-жылдын 24-мартындагы №161 токтому менен эки түрдөгү бланк бекитилди: санарип жана типографиялык. Техникалык талаптарды жумушчу комиссия бекиткен, ал эми бланктарда 10дон ашык коргоо элементтери бар”— дейт паспорт иштери жана жарандык абал актылары бөлүмүнүн башчысы Перизат Сейдакматова.
Анын айтымында, эми жаран онлайн кезекке жазылып, КТБга келип, эч кандай документ алып келбестен, “Түндүк” мобилдик тиркемесиндеги ID-картаны колдонсо жетиштүү болот.
Баланын төрөлүшү боюнча медициналык күбөлүк да автоматташтырылган. Ал да жарандын телефонунда болот. Эгер күбөлүктү чек арадан өтүү үчүн көрсөтүү зарыл болсо, аны типографиялык бланкка басып чыгарууга мүмкүнчүлүк бар.
“Система автоматтык түрдө санарип күбөлүктү түзөт, анда жеке номер болот жана ал типографиялык бланкка да түшүрүлөт. Бул күбөлүктөрдү кайрадан алуу учурларын азайтуу үчүн жасалган”,-дейт ал.
