"Эң таза шаар", "Эң таза айыл аймагы" республикалык конкурсунун жеңүүчүлөрү аныкталды
29-декабрда Жаратылыш ресурстары министрлигинде "Эң таза шаар" жана "Эң таза айыл аймагы" аттуу республикалык конкурстун жеңүүчүлөрүн сыйлоо аземи болуп өттү.
Ведомствонун басма сөз кызматы билдиргендей, конкурстун жыйынтыгы боюнча жаратылыш ресурстары министри Медер Машиев жеңүүчүлөргө сертификаттарды жана баалуу сыйлыктарды төмөнкү номинациялар боюнча тапшырды:
- Нарын облусунун Ат-Башы районундагы Ак-Муз айыл аймагына — "Шумкар" үлгүсүндөгү автотехниканы алуу үчүн сертификат;
- Баткен облусунун Раззаков шаарына — таштандыларды сорттоочу линияны алуу үчүн сертификат;
- Чүй облусунун Орловка шаарына — кошумча сыйлык катары үч дөңгөлөктүү мотороллер.
Сыйлоо аземинин алкагында экология тармагын өнүктүрүүгө салым кошкон өнөктөштөр да сыйланышты.
Маалыматта айтылгандай, аталган конкурс жергиликтүү өз алдынча башкаруу органдарын калктуу конуштардын санитардык абалын жакшыртууга, калктын экологиялык маданиятын жогорулатууга жана катуу тиричилик калдыктарын натыйжалуу башкаруу тутумун өнүктүрүүгө дем берүү максатын көздөгөн.
