Орбитадагы космонавттар күнүнө 400 доллардан киреше табат
Bloomberg агенттигинин орус тилиндеги версиясында жарыяланган маалыматка ылайык, орусиялык космонавттар орбитадагы алты айлык экспедиция учурунда болжол менен 5,5 миллион рубль киреше табышат.
Космонавт Сергей Рязанскийдин айтымында, космоско учуп жүргөн мезгилде анын күнүмдүк кирешеси орто эсеп менен 400 долларды түзгөн. Стандарттуу алты айлык миссиянын ичинде бул сумма 72 миң долларга чейин жетет.
Орусиялык космонавттардын негизги айлык акысы туруктуу негизги эмгек акыдан түзүлөт. Ачык булактардагы маалыматтарга ылайык, биринчи учуудан кийин алардын айлык маянасы сый акы жана компенсацияларсыз эсептегенде айына орто эсеп менен 130–140 миң рублди түзөт.
Ошентип, узак мөөнөттүү экспедициялар учурунда космонавттардын кирешесинин негизги бөлүгү дал ошол орбитада иштеген мезгилге туура келет.
Салыштыруу үчүн айтсак, NASAнын астронавттарына эмгек акы башка система боюнча төлөнөт. Алар АКШнын федералдык мамлекеттик кызматкерлери болуп эсептелет жана учуу маалында кошумча "космостук" үстөктөрсүз эле кадимки айлык маянасын ала беришет. Федералдык эмгек акы шкаласына, кызмат ордуна жана иш стажына жараша NASA астронавттарынын жылдык кирешеси орто эсеп менен 100 миңден 160 миң долларга чейин жетет.
Мындан тышкары, NASA астронавттарына символикалык суткалык төлөмдөр гана берилет — күнүнө болжол менен 5 доллар. Алты айлык миссиянын ичинде бул сумма орто эсеп менен 1 миң долларды түзөт.
