Ю.Фучик көчөсүн оңдоо долбоорунун наркы 277,5 млн сомду түздү
Кечээ, 19-октябрда Биринчи май районунун акими Улан Сарылбек уулу жана Транспорт департаментинин директору Уланбек Бейшенбаев шаар тургундары менен бирге Ю.Фучик көчөсүн Дэн Сяопин проспектисинен Жибек-Жолу проспектисине чейинки оңдолгон бөлүгүн ачышты. Бул тууралуу муниципалитеттен билдиришти.
Жалпы узундугу 3,2 чакырым болгон Фучик көчөсүн реабилитациялоо үч этап менен жүрүп, долбоордун баасы 277,5 миллион сомду түзөт. Подрядчы — «ДорстройГрупп» ЖЧКсы.
Бүгүн ачылган экинчи этаптан кийин акыркы бөлүк — Жибек-Жолу проспектисинен Аска-Ташка чейинки тилке 2025-жылдын ноябрында аякташы пландалууда.
Фучик көчөсүнүн жаңыланышы шаар ичиндеги негизги транспорттук каттамды жакшыртып, 2026-жылы өтө турган ШКУ саммитине даярдыктын бир бөлүгү болуп саналат.
Жолдун жабуусу жана негиздери жаңыртылып, тротуарлар, бордюрлар жана ирригация системасы орнотулду. Бишкек мэриясы коопсуз жана ыңгайлуу жол шарттарын түзүү иштерин улантууда.
