Президент МинКаб отчетторун кароодо жана бюджетти бекитүүдөгү "соодалашууну" сынга алды
Президент Садыр Жапаров Жогорку Кеңештин депутаттарына кайрылуусунда министрлер кабинетинин отчетторун кароодо жана республикалык бюджетти бекитүүдөгү "соодалашуу" (торг) практикасын катуу айыптады.
"Айрым эл өкүлдөрү ачык эле соодалашууга барышат: “Менин айылымдагы бир километр жолду асфальттап бергиле, болбосо отчетко каршы добуш берем”, — дешет. Натыйжада чындап эле болгону бир километр жол гана асфальтталат", — деди мамлекет башчысы.
Президент мындай иш-аракеттерге толугу менен тыюу салынганын айтып, анын экономикалык жактан натыйжасыз экенин баса белгиледи: "Өзүңөр ойлонуп көргүлө: бир эле километр жол үчүн канча техника тартылат, инерттик материалдар менен асфальт канча алыстан ташылат. Натыйжада бир километр жолдун курулуш наркы 2–3 эсеге чейин кымбаттайт", — деди ал.
Садыр Жапаровдун айтымында, акылга сыярлык ыкма — жолдорду дароо кеминде 10 чакырымдан, ал эми зарыл учурда 100 чакырымга чейин бирдиктүү тилке катары куруу. Бул асфальт жана бетон заводдорун жолго жакын жайгаштырууга, жергиликтүү карьерлерди ачууга жана бюджеттик каражаттарды олуттуу үнөмдөөгө мүмкүндүк берет.
"Кымбат баадагы бир километрдин ордуна биз толук кандуу жол тилкелерин курабыз. Келечекте ар бир айылга чейин асфальт жол жеткиребиз», — деп убада берди президент.
