Депутат Болот Ибрагимов мас абалында унаа башкаргандарга айып пулду 80 миң сомго көтөрүүнү сунуштады
Жогорку Кеңештин Укук тартиби боюнча комитети бүгүн жол кыймылынын эрежелерин бузгандыгы үчүн жоопкерчиликти күчөтүү тууралуу мыйзам долбоорун карап чыкты.
Документтеги нормалардын бирине ылайык, мас абалында унаа башкаргандыгы үчүн төмөнкү жаза чараларын киргизүү сунушталууда:
— айдоочулук күбөлүктөн 2 жылга ажыратуу (азыркы 1 жылдын ордуна) жана 10 суткага камакка алуу (3 сутканын ордуна);
— кайталанган мыйзам бузуу үчүн айдоочулук күбөлүктөн 4 жылга ажыратуу жана унааны убактылуу алып коюу;
— наркологиялык текшерүүдөн өтүүдөн баш тартуу айдоочулук күбөлүгү бар адамдар үчүн 2 жылга ажыратууга, ал эми күбөлүгү жок айдоочулар үчүн 15 суткага камакка алууга алып келет.
Талкуу учурунда депутат Болот Ибрагимов мас абалында унаа башкаргандыгы үчүн айып пул киргизүү жана аны 60 же 80 миң сомго чейин жогорулатуу сунушун билдирди.
Ички иштер министринин орун басары Октябрь Урмамбетов учурда ар бир инспектор боди-камералар менен жабдылганын, алардын иши көзөмөлдөнүп турарын белгиледи. Ал айып пулдарды көбөйтүү маселесин кароого болорун кошумчалады.
Депутаттын айып пулдун белгилүү бир пайызын инспекторлорго төлөө сунушуна жооп берип жатып, ИИМдин орун басары мындай норма буга чейин эле бар экенин билдирди.
"Кызматкерлерге айып пулдун суммасынан 10% сыйлык катары каралган. Мисалы, инспектор айып пул салса, анын 10%ы бонус катары эмгек акысына кошулат", — деп түшүндүрдү ал.
