Дастан Бекешев такси кызматын лицензиялоо 10 миңдеген айдоочуларды ишсиз калтырарын билдирди
Жогорку Кеңештин депутаты Дастан Бекешев 1-февралдан тартып такси кызматын лицензиялоо он миңдеген айдоочуларды жумушсуз калтырышы мүмкүн экенин жана такси бааларынын өсүшүнө алып келерин айтып, өкмөттү мөөнөттөрдү жылдырууга чакырды.
Депутаттын айтымында, эгерде өкмөт талаптарга өзгөртүүлөрдү киргизбесе, көптөгөн жарандар такси ишмердүүлүгү менен алектене албай калышат, натыйжада рыноктогу сунуш кескин кыскарат.
Бекешев мунун фонунда жол киренин баасы өсүшү мүмкүн экенин белгиледи: "Андай болсо такси 200–300 сом эмес, 700–800 сом болуп калат", — деди ал.
Ошондой эле депутат учурдагы лицензиялоо шарттары айрым айдоочулар үчүн, анын ичинде майыптыгы бар адамдар үчүн тоскоолдуктарды жаратып жатканын билдирди. Мисал катары ал кулагы укпаган жарандарды атап, анын айтымында, документтерди тапшыруу учурунда "ЛОР дарыгерлер кандайдыр бир себептер менен мөөр баспай коюшат", бирок ошол эле учурда бул адамдар "унаа айдай алышат, айдап келишкен жана айдоочулук күбөлүк алышкан".
Депутат кошумчалагандай, лицензиялоо талаптарына соттолгон жарандар да илиниши мүмкүн. Алардын катарына саясий беренелер боюнча же этиятсыздык менен жасалган кылмыштар үчүн соттолгондор да кирет. Анын айтымында, көптөр үчүн такси айдоо — киреше табуунун жалгыз жолу болуп саналат, анын ичинде насыясы бар жарандар жана Россиядан кайтып келген мигранттар үчүн да.
Бекешев лицензия берүүнүн мөөнөтү рыноктун чыныгы көлөмүнө туура келбей жатканын да белгиледи. Анын айтымында, учурда болжол менен 7 миңдей адам гана лицензия алган, ал эми таксисттердин жалпы саны 60–70 миңге жетет. "Такси айдоочуларынын саны болжол менен 10 эсеге азаят", — деди депутат.
