Сентябрь айына чейин Сокулукта электромобиль чыгаруучу завод курулат
Чүй облусунун Сокулук районунда электромобилдерди чыгаруучу завод куруларын Министрлер Кабинетинин 2026-жылга карата бекитилген иш планына ылайык маалым болду.
Ведомствонун маалыматына ылайык, электромобилдерди чогултуу жана өндүрүү боюнча ишкана жеке инвестицияларды тартуу менен 2026-жылдын 30-сентябрына чейин пайдаланууга берилүүсү пландалууда.
Долбоордун аткарылышы үчүн Экономика жана коммерция министрлиги, Президенттин Чүй облусундагы ыйгарым укуктуу өкүлчүлүгү, ошондой эле Инвестициялар боюнча улуттук агенттик жооптуу болуп белгиленди.
Эске салсак, 2024-жылы Экономика жана коммерция министрлигинин өнөр жай саясаты башкармалыгынын башчысы Арслан Базиев радио эфиринде 2025-жылы Сокулук районунда кыргыз бренди менен автоунаалар чыгарылуучу завод ишке киргизилерин билдирген.
Анын айтымында, бул ишкана Кытайдын Jaecoo компаниясы менен биргеликте курулууда.
Jaecoo — Кытайдын Chery Automobile компаниясынын бөлүмү болуп саналат. Бул бренд негизинен жол тандабастарды жана кроссоверлерди Европа өлкөлөрүнө, Россияга, Малайзияга, Жакынкы Чыгышка жана Түштүк Африкага экспорттоого багытталган.
