Бишкек–Токмок каттамына кошумча кичи автобустар киргизилди
Социалдык тармактарда кечки саат 19:00дөн кийин Бишкек–Токмок каттамында кичи автобустар жүрбөй, жүргүнчүлөр такси кызматын пайдаланууга мажбур болуп жатканы тууралуу кайрылуулар түшкөн. Бул тууралуу Транспорт жана коммуникациялар министрлигинин маалымат кызматы билдирди.
Мониторингдин жыйынтыгында жума жана ишемби күндөрү Бишкектен Токмокко каттаган жүргүнчүлөрдүн саны адаттагыдан көп экени аныкталган. Маселени чечүү максатында 2-февралда Жерде жүрүүчү жана суу транспорту департаменти №350 жана №353 маршруттарын тейлеген ишканалардын өкүлдөрү менен жыйын өткөрдү.
Жыйын учурунда дем алыш күндөрү жүргүнчүлөрдүн агымы көбөйөрү, ал эми кечки саат 20:00дөн кийин жүргүнчүлөр азайып, айдоочулар чыгымын жаба албай калып жатканы айтылды.
Жыйынтыгында жүргүнчү ташууну үзгүлтүксүз камсыз кылуу үчүн, зарыл болгон учурда бекитилген графиктен тышкары кошумча кичи автобустар чыгарылып, рейстердин саны көбөйтүлдү.
