Кыргызстандын 2 өткөрмө пунктунда 2025-жылы накталай эмес төлөмдөн 300 млн сом чогулган
"Сосновка" жана "Кара-Көл" өткөрмө пункттарында QR-код аркылуу накталай эмес төлөмдөр системасынын жардамы менен 2025-жылы 300 млн 266 миң 484 сом чогултулган. Бул көрсөткүч өткөн жылдын ушул эле мезгилине салыштырмалуу 35,48%га көп экенин Транспорт министрлиги билдирди.
Министрликтин маалыматына ылайык, системаны өркүндөтүү жана көзөмөл механизмдерин күчөтүү натыйжасында 2025-жылы накталай эмес төлөмдөрдүн үлүшү кыйла жогорулап, учурда төлөмдөрдүн 98%ы накталай эмес ыкма менен жүргүзүлүүдө.
"Бул, өз кезегинде, адам факторун минималдаштырууга, ошондой эле коррупциялык тобокелдиктерди жоюуга мүмкүндүк берди. Ошол эле учурда "Сосновка" жана "Кара-Көл" өткөрмө пункттарында жол тилкелерин кеңейтүү боюнча иштер ийгиликтүү аткарылды.
"Сосновка" пунктунда кошумча тилкелер толугу менен курулуп, пайдаланууга берилди, ал эми "Кара-Көл" пунктунда 2025-жылы өткөрүү мүмкүнчүлүгүн жогорулатууга багытталган кеңейтүү иштери толук аяктап, жүрүүчү бөлүк талап кылынган техникалык параметрлерге ылайык келтирилди.
Маалыматтык системалардын серверлери жана программалык камсыздоосу үзгүлтүксүз жаңыртылып, туруктуу жана үзгүлтүксүз иштеши камсыздалып жатат", — деп айтылат билдирүүдө.
