Өлкө аймагында жол курулушу жана тазалоо иштери күчөтүлдү
Транспорт жана коммуникациялар министрлигине караштуу Жол тейлөө ишканалары тарабынан өлкө аймактарындагы жолдорду куруу, оңдоо жана калыбына келтирүү иштери үзгүлтүксүз уланууда. Бул тууралуу ведомстводон билдиришти.
Акыркы күндөрү аба ырайынын туруксуздугуна байланыштуу айрым унаа жолдорунда тоо боорунан таш жана кар көчкүлөр түшүп, алар ыкчам түрдө тазаланууда.
Бүгүнкү күндө республиканын стратегиялык жана ички чарбалык маанидеги жолдорунда төмөнкү иштер аткарылды:
№18 Жол тейлөө ишканасы тарабынан Түндүк–Түштүк альтернативдик унаа жолунун Арал – Казарман тилкесинин 266–267-чакырымдарында таш көчкү тазаланып, жер жумуштары жүргүзүлдү. Жалпысынан 1 160 куб метр таш жана топурак чыгарылды.
№1 Жол тейлөө ишканасы Кара-Сакал – Токбай – МТФ №2 унаа жолунун Кызыл-Туу айылына кире беришиндеги 2,7 чакырым жолго асфальт-бетон төшөө иштерин толук аяктады.
№25 Жол тейлөө ишканасы "Ала-Арча" автожолунда жолдун сапатын жакшыртуу максатында аң-чөнөктөрдү жамоо иштерин жүргүзүүдө.
№43 Жол тейлөө ишканасы Красная Речка – Ысык-Ата унаа жолунда планга ылайык жолду калыбына келтирүү жана аң-чөнөктөрдү жамоо иштерин улантууда.
Министрликке караштуу бардык Жол тейлөө ишканалары жол кыймылынын коопсуздугун камсыздоо жана жарандар үчүн ыңгайлуу шарттарды түзүү багытында ишин улантууда.
