Бишкек шаарынын Октябрь райондук соту 7-майда төрт адамдын «Кумтөр Голд Компани» (Centerra Gold Inc. алтын өндүрүүчү компаниясынын туунду компаниясы ) ЖАКна болгон доо арызын канааттандырды. Ага ылайык, Кумтөр кенин иштетүүдө Давыдов жана Лысый мөңгүлөрүнө келтирилген зыяндар үчүн 261.7 млрд  сом, андан сырткары 1.3 млрд сом улуттук салык (пошлина)  мамлекетке төлөп берүүгө милдеттендирилди.  

Сот иши Айбек Сарыбаев, Нарис Калчаев, Аблас Жээнбеков жана Кемелбек Кутмановдун «Кумтөр Голд Компани» ишканасынын үстүнөн жазган арызынын негизинде башталган. Активисттер ишкананын Кумтөр кенин иштетүүдө Давыдов, Лысый мөңгүлөрүнө калдыктарды топтогонун мыйзамсыз деп таанып, мамлекеттин пайдасына кенемте өндүрүп берүүнү суранышкан.  

Октябрь райондук соту бул арызды канааттандырып, соттун чечими төмөндөгүдөй болгон.  

«Кумтөр Голд Компани» ЖАКун Кыргызстандагы Кумтөр алтын кениндеги аракеттери жана Давыдов, Лысый мөңгүлөрүндөгү калдык топтоочу жай мыйзамсыз деп табылсын.

«Кумтөр Голд Компани» ишканасы мамлекетке 261 719 674 080 (эки жүз алтымыш бир миллиард жети жүз он тогуз миллион алты жүз жетимиш төрт миң сексен) сомду мамлекеттин пайдасына төлөп берсин.

«Кумтөр Голд Компани» ЖАК 1 308 653 370  (бир миллиард үч жүз сегиз миллион алты жүз элүү үч миң үч жүз жетимиш) 40 тыйынды мамлекеткен төлөп берүүгө милдеттендирилсин.