Президент «КР айрым мыйзам актыларына өзгөртүүлөрдү киргизүү жөнүндө» мыйзамга кол койду
Президенти Садыр Жапаров «КР айрым мыйзам актыларына («Акционердик коомдор жөнүндө» КР мыйзамына, КР Жазык кодексине) өзгөртүүлөрдү киргизүү жөнүндө» КР мыйзамына кол койду.
Мыйзам Жогорку Кеңеши тарабынан 2021-жылдын 6-майында кабыл алынган.
Мыйзамдын негизги максаты жер казынасын коргоонун, экологиялык жана өнөр жай коопсуздугунун талаптарын бузган, жумуштар таасирин тийгизген аймакта жашаган же иштеген адамдардын өмүрүнө же ден соолугуна түздөн-түз коркунуч келтирген коомдордо тышкы башкарууну киргизүүнүн негиздери менен тартибин жөнгө салуучу ченемдерди киргизүү болуп саналат.
Мындан тышкары, Кыргыз Республикасынын Жазык кодекси убактылуу тышкы башкаруу киргизилген учурда акционердик коомдун башкаруу органдарына коюлган чектөөлөрдү бузгандыгы үчүн жоопкерчиликти караган берене менен толукталды.
Мыйзам расмий жарыяланган күндөн тартып күчүнө кирээри тууралуу президенттин маалымат сайты билдирет.
Эске салсак, буга чейин Эл аралык ишкерлер кеңеши (ЭИК) белгилегендей, акыркы өзгөртүүлөр концессиялык келишимдин негизинде жер казынасын пайдалануу укугун жүзөгө ашырган акционердик коомдорго тиешелүү. Мындай шартта Кыргызстанда “Кумтөр Голд” ишканасы гана иштейт.
7-майда Бишкектин Октябрь райондук соту “Кумтөр Голд Компаниясын” Кыргызстандын экология мыйзамдарын бузганы үчүн мамлекетке 261 млрд 719 млн 674 миң сом кенемте төлөөгө милдеттенлирилген.
