Кыргызстандык ишкерлер Amazon сайтында соода жүргүзүүгө мүмкүнчүлүк алышты
Дүйнөдөгү эң ири электрондук соода платформасы, америкалык Amazon компаниясы жакында Борбор Азиянын башка өлкөлөрү – Казакстан, Өзбекстан, Тажикстан жана Түркмөнстан сыяктуу эле Кыргызстандын товар өндүрүүчүлөрүнө да түздөн-түз катталуу жана соода жүргүзүү мүмкүнчүлүгүн ачты.
Жакында аталган сайттын сатуучулары түздөн-түз платформада каттала алган өлкөлөрдүн тизмеси жаңыртылды. Жаңы тизмеде Кыргызстан жана башка Борбор Азия өлкөлөрү пайда болду.
Amazon аркылуу соода жүргүзүүнү баштоо үчүн, кыргыз ишкерлери каттоодон өтүп, өз эсебин ачып, тастыктоочу документтерди киргизиши зарыл, ошондой эле катталуучунун банк эсеби жана эл аралык төлөм картасы болушу керек. Бардык шарттарды «Амазондун» веб-сайтынан таба аласыз.
Economist.kg мурда жазгандай, өткөн жылы Амазондун өкмөттү трансформациялоо боюнча директору Лиам Максвелл Бишкекке келип, ошол кездеги премьер-министр Мухаммедкалый Абылгазиев менен жолугушкан. Сүйлөшүүлөрдүн жүрүшүндө тараптар электрондук коммерцияны өнүктүрүүнү талкуулашкан эле.
Жарым жыл мурда кыргызстандык ишкер Бермет Кошоева Economist.kg басылмасына берген маегинде Россия, Украина жана Беларуссия «Амазондо» соода кылууга уруксат берилген өлкөлөрдүн тизмесинде экендигин, бирок Борбор Азия ишкерлери үчүн мындай мүмкүнчүлүк ачыла электигин айткан эле. «Мен сайттын колдоо кызматына биздин өлкөлөргө дагы иштөөгө мүмкүнчүлүк берилсин деп жаздым, эгерде сиз да Амазондо соода кылууну кааласаңыз, анда аларга кат жазсаңыз болот» – деген Кошоева.
«Амазондо» кантип бизнес баштоо тууралуу Бермет Кошоеванын маегин бул шилтемеден окусаңыз болот.
Wildberries
Эскерте кетсек, Апрель айынын башында КРнын электрондук ассоциациясы КМШдагы эң ири онлайн-аянтчасы болгон Wildberries сайты менен кызматташуу тууралуу Меморандумга кол койгон. Натыйжада, май айынан тартып кыргызстандык ишкерлер аталган платформага түз катталып, мыйзамдуу түрдө соода жүргүзүүгө мүмкүнчүлүк алышкан.
Wildberries онлайн-сатуу платормасында 40 млн колдонуучу жана 90 миң сатуучу бар.
Бизнесин Wildberries платформасында да жайылткысы келгендер үчүн Economist.kg «Wildberries платформасында бизнести кантип баштаса болот?» деген нускама даярдаган.
