Альтернативдик булактарды табалы – Кыргызстандыктарды электр энергиясын үнөмдөөгө чакырышты
Кыргызстандыктарды электр энергиясын үнөмдүү пайдаланууну, электр шаймандарын негизсиз күйгүзбөөнү, ысытуучу лампаларды колдонуудан баш тартууну жана үйдү жана сууну жылытуунун башка булактарына өтүүнү суранышты.
«Кыргызстан улуттук электр тармактары» ААКнын басма сөз кызматы билдиргендей, КРда электр энергиясын керектөөнүн көбөйүшүнөн жана электр энергиясынын булагы болгон Нарын дарыясынын куймаларындагы кардын топтолушунун аздыгынан жана анын жетишсиздигинен улам алдыдагы жылытуу сезону оор болуусу күтүлүүдө.
Компания электр энергиясынын жетишсиздигин азайтуу үчүн төмөнкү чаралар көрүлгөнүн белгиледи.
- Биринчи чара – Казакстан жана Өзбекстан менен электр энергиясын алмашуу. 2021-жылдын март айынан 2022-жылдын март айына чейин алардан 1,65 млрд кВт/саат алынып, 2021-2023-жылдардын жай айларында 550 миллион кВт/саат үч этап менен кайтарылып берилет.
- Экинчи чара – электр энергиясынын тартыштыгын жабуу үчүн Бишкек ЖЭБине кошумча жүктөөлөрдүн болушу болжол менен кошумча 1 млрд кВт/саат берет.
- Кийинки эффективдүү чара – бул электр энергиясын бөлүштүрүүчү энергетикалык компанияларга жана электр энергиясын дүңүнөн сатып алуучуларга чектөө коюу.
Бардык РЭКтер – «Түндүк электр» ААК, «Чыгыш электр», «Жалалабатэлектро» жана «Ошэлектро» электр энергиясын керектөөнү белгиленген чектерге чейин азайтуу боюнча жигердүү иш алып барышат.
«Ошол эле убакта «Кыргызстан улуттук электр тармактары» ААКнын бир канча жолу койгон талаптарына карабастан, эң ири «Электросила», «Энерготехсервис», «Глобал энерджи» жана «ЭК групп» сыяктуу электер энергиясын дүңүнөн сатуучулар керектөөнү белгиленген чекке чейин түшүргөнү байкалган жок», – деп билдирет маалымат кызматтан.
