Венгриянын Wizz Air компаниясы Кыргызстанда аба хабын ачууну пландаштырууда
Венгриянын Wizz Air авиакомпаниясы каттам тармактарын кеңейтүү үчүн Кыргызстанда өзүнүн аба хабын ачууну пландаштырууда. Бул тууралуу Венгриянын элчиси Шандор Дороги өлкөлөр ортосунда түз аба каттамдарын ачуу маселесин талкуулап жатканда билдирди. Транспорт министрлигинин басма сөз кызматы билдиргендей, 25-майда бул маселе тууралуу кезектеги сүйлөшүүлөрдө айтылган.
Элчинин айтымында, Wizz Air компаниясы буга чейин Абу-Дабиде (БАЭ) Жакынкы Чыгышта, Африкада жана Борбордук Азияда каттамдар тармагын кеңейтүү үчүн ушундай базаны ачкан.
Транспорт министри Гүлмира Абдралиева авиакомпаниянын демилгесин кубаттап, өз ара кызматташууга негизделген ар тараптуу колдоону убада кылды. Ошондой эле ал, эгер Венгрия тарап кызыкдар болсо, абанын бешинчи даражасына (авиакомпанияларга жүргүнчүлөрдү жана жүктөрдү чет өлкөдөн экинчи өлкөгө өз мамлекетине учуп бара жатканда акы менен ташуу укугун берет) укук берүү маселесин кароого даяр экендигин билдирди.
Элчи өз кезегинде 7-июнда Венгриянын авиакомпаниясынын өкүлдөрү Кыргызстанга келип, каттамды ачуу маселеси боюнча кеңири жолугушууларды өткөрүүсү күтүлүп жаткандыгын да кошумчалады.
