«Улутэнергохолдинг» электр тармактарына 30 млрд сом инвестиция салууну көздөөдө
«Улуттук энергетикалык холдинг» электр тармактарына 30 млрд сом инвестиция салууну көздөөдө. Бул тууралуу Энергетика жана өнөр жай министринин орун басары Нурдин Кожогулов бүгүн, 7-июнда «Кыргызстандын энергетикасы» тегерек столунда билдирди, деп маалымдайт Энергетика министрлигинин маалымат кызматы.
Маалыматка таянсак, 2021-2025-ж.ж. «Улутэнергохолдинг» 110-500 кВ тармактарын курууга, реконструкциялоого жана модернизациялоого 8.4 млрд сом инвестиция салат. Инвестициялык программа төмөнкүлөрдү камтыйт:
- Инвестициялык долбоорлор – 6.6 млрд сом
- 110-220 кВ көмөк чордондорун модернизациялоо жана реконструкциялоо – 1.5 млрд сом
- 110-220 кВ аба чубалгыларын модернизациялоо жана реконструкциялоо – 246 млн сом
Холдинг ошондой эле региондорго жана энергетика тармагын санариптештирүүгө багытталган электр тармактарын өнүктүрүүгө 21.4 млрд сомдон ашуун каражат жумшоону көздөп жатат. Инвестициялык программа төмөнкүлөрдү камтыйт:
- электр менен жабдуу тармактарын куруу жана реконструкциялоо, 5 миңден ашык трансформатордук көмөк чордондорду орнотуу – 19.5 млрд сом
- жаңы конуштарды электрлештирүү – 1.9 млрд сом
Кожогуловдун айтканына караганда, электр жабдууларын өндүрүү боюнча энергетикалык өнөр жай кластери түзүлүп, андан кийин республиканын токтоп турган ишканаларында буйрутмаларды жайгаштырууга болот. Программанын алкагында 725 миң АСКУЭ эсептегичтерин орнотуу пландаштырылууда, ал АСКУЭ эсептегичтеринин үлүшү этап-этабы менен азыркы 13% дан 76% га чейин жогорулайт.
Бирок министрдин орун басары миллиарддаган карыздар турганда «Улутэнергохолдинг» энергетика тармагына каражатты кайдан алып берээрин айткан жок.
