Улуттук Банк банктардын уставдык капиталынын өлчөмүнө талапты көбөйтөт
Жакынкы айларда Кыргызстандагы коммерциялык банктардын уставдык капиталынын өлчөмүнө карата талаптарды өзгөртүү пландаштырылууда. Бул тууралуу Улуттук Банктын төрагасы Толкунбек Абдыгулов Economist.kg басылмасына берген маегинде билдирди.
Абдыгуловдун айтымында, мындай чаралар каржы базарынын өнүгүшүнө жана «узак» мөөнөттүү насыялардын пайда болушуна шарт түзөт.
«Эмне үчүн бизде узак мөөнөттүү насыялар жок? Анткени бизде эң узак депозиттик мөөнөт 3 жыл. Банк узак мезгилге акча бериш үчүн, ал өз депозиттерин узартышы керек, же өзүнүн капиталы болуш керек. Базардын өзүнүн жеңилгис мыйзамдары болот», – деп түшүндүрдү ал.
Бүгүнкү күндө Кыргызстандагы коммерциялык банктардын уставдык капиталына болгон талап 600 млн сом.
«2016-жылы парламентте «КРнын Улуттук Банкы, банктар жана банк иштери жөнүндө» мыйзам жактырылганда, биз банктарга 1.5 млрд сом уставдык капиталга талап коюуну суранганбыз. Парламент бизге жок деген жообун берген. Чакан банктар – бул жергиликтүү инвестициялар. Келгиле, 600 млн акчага талап коелу, андан кийин эки-үч жыл аралыгында алардын ар бири 100 млн кошсун дешкен. Ошол эле учурда, алар эмнеге экономикада узак мөөнөттүү ресурстар жетишпейт дешет. Уставдык капиталы болгону 600 млн болсо, ал каякка жетет? Эгерде уставдык капиталы 3 млрд болсо, банк өзүнүн 3 млрд сомуна ээ болот жана аны узак мөөнөткө насыяга бере алат», – деди Улуттук Банктын башчысы.
Ал белгилегендей, азыр Улуттук Банк жөнүндөгү каралып жаткан мыйзамга ылайык, банктардын уставдык капиталына карата жаңы талап киргизилмекчи.
«Жергиликтүү инвесторлорду дагы коргоо керек, ошондуктан биз алар үчүн түрдүү варианттарды издейбиз. Балким, биз чектелген лицензия беребиз, анын чегинде банк бойдон кала берет, бирок бардык кызматтарды көрсөтүшпөйт. Же болбосо, жаңы ачылган банктарга талап коёбуз. Бул кандай механизмдер болот – биз аны банктар менен чогуу талкуулайбыз», – деп түшүндүрдү Абдыгулов.
Коммерциялык банктардын уставдык капиталына болгон талап канчалык көбөйөрү азырынча белгисиз. Бирок, 2016-жылы Улуттук Банк бул сумманы 1.5 млрд сомго чейин көтөрүүнү сунуш кылган.
Улуттук Банктын төрагасы Толкунбек Абдыгулов менен болгон маекти толугу менен бул жерден окусаңыз болот.
