Кыргыз бийлиги Япониядан 1.1 млн доза коронавируска каршы вакцина сурады
Вице-премьер-министр Жылдыз Бакашова Япониянын КРгы элчисинен Япония өкмөтүнүн Кыргызстанга 1.1 млн доза коронавируска каршы вакцина берүү мүмкүнчүлүгүн карап чыгууга көмөктөшүүнү суранды. Бакашова мындай өтүнүчүн бүгүн, 25-июнда Япониянын элчиси Сигеки Маэда менен болгон жолугушуусунда айтты.
Ал белгилегендей, вакциналарды сактоо үчүн вакциналардан тышкары жетиштүү деңгээлде муздатуучу шаймандар керек. «Мен Япония тараптын ушул оор мезгилде колдо көрсөтүп, калкты вакцинациялоонун зарыл чендерин камсыз кылууга олуттуу салым кошот деп ишенем», – деди Бакашова.
Япониянын элчиси министрлер кабинетинин өтүнүчүнө түз жооп берген жок. Ал калкты вакцинациялоонун жана керектүү санитардык-эпидемиологиялык чараларды сактоонун маанилүүлүгүн гана белгилеп өттү.
