КРгы жолдордун 22% гана жакшы абалда – Транспорт министрлиги
Кыргызстандын автомобиль жолдору болжол менен жүргүнчүлөрдүн 98%ын жана жүк ташуунун 96%дан ашыгын камсыз кылат. Ошол эле учурда жолдордун 22%ы гана жакшы абалда. Бул тууралуу Транспорт министрлигинин басма сөз кызматы билдирди.
Министрлик Жол фондун түзүү – бул көйгөйдү чечүүгө жардам берет, ошондой эле жол тармагынын бюджетке болгон көз карандылыгын, тышкы донорлордун жардамын жоюуга жана мамлекеттик карыздын өсүшүн токтотууга мүмкүндүк берет деп эсептейт.
Фондду бензинге жана дизелдик отунга акциздик салыктан түшкөн каражаттар жана жолдорду пайдалануудан түшкөн төлөмдөр менен каржылоо сунушталууда.
Мурдагы инвестициялардын натыйжасында курулган жол активдери талаптагыдай эмес тейлөөдөн улам бузулуп жатат. Оңдоо жана бекемдөө иштери жетиштүү деңгээлде жүргүзүлбөсө, келечекте ири инвестицияларга муктаждык сакталып калышы мүмкүн экендигин Транспорт министрлиги кабарлады.
Дүйнөлүк Банктын изилдөөлөрүнө ылайык, жолду калыбына келтирүү – жолдун эксплуатациялык циклинин мезгилиндеги туруктуу тейлөөгө караганда үч эсе кымбатка турат.
Учурдагы жолдорду кармоого, оңдоо-түздөөгө консолидацияланган ресурстардын 10.3%ы гана кетет жана бул өтө эле аз. Натыйжада, жолдордун кызмат кылуу убактысы кыскарууда жана узак мөөнөттүү инвестицияларга жаңы муктаждыктар жаралууда деп билдирди департамент.
Ошол эле учурда, 2018-2040-жылдарга КРны өнүктүрүүнүн Улуттук стратегиясында жыл сайын кеминде 550 км ички жолдорду оңдоо, кеминде 15 көпүрөнү куруу каралган.
