Тышкы башкаруу киргизилгенден бери Кумтөр 82 млн долларлык алтын сатты
«Кумтөр Голд Компаниге» убактылуу тышкы башкаруу киргизилген күндөн бери 44 миң унция алтын сатылды. Жалпы киреше 82.2 млн долларды түзгөнүн компаниянын басма сөз кызматы билдирди.
Алтындын дүң кирешеси 40.3 млн долларды түзсө, өздүк наркы дээрлик 42 млн доллар болгон.
Алтындын баасынын өзгөрүп турушунан улам, 16 миң унция алтындын биринчи партиясы бир унцийи 1813 доллардан сатылса, 28 миң унция алтындын экинчи партиясы, 1893 доллардан сатылган. Компаниянын билдирүүсүндө баалуу металлды сатып алуучулар жөнүндө эч кандай маалымат жок.
Белгилей кетсек, компания алтын сатууда бир катар кыйынчылыктарга туш болгон эле. Буга чейин «КГК» компаниясынын тышкы менеджери Тенгиз Бөлтүрүк мындан ары кендеги алтындын бардыгын Улуттук Банк сатып алаарын айткан. Ал тургай биринчи келишимдин суммасын 29 млн доллар болду деп билдирген эле. Бирок, көп өтпөй Улуттук банк Кумтөрдөн алтын сатып алуу чечими кабыл алына электигин айтып, бул маалыматты четке каккан болчу.
Адистердин айтымында, алтынды Улуттук Банктын депозитинен сатып алуу шашылыш кадам болуп калышы мүмкүн. Анткени Centerra Golc Inc. регуляторду кошо айыпталуучу катары жоопко тартса, бул өз кезегинде Кыргызстандын алтын-валюта резервдерине доо кетирет.
