Орус-Кыргыз Өнүктүрүү Фонду долбоорлорду каржылоо ишин жандандырат
Орус-Кыргыз Өнүктүрүү Фонду (ОКӨФ) КРгы долбоорлорду каржылоону 1-июлдан баштап улантат. Тиешелүү чечим ОКӨФтүн башкармалыгынын төрагасы Артем Новиков менен Фонддун кеңешмесинин төрагасы, РФнын финансы министринин орун басары Тимур Максимов менен Москвада өткөн жолугушуунун жыйынтыгында кабыл алынды. Бул тууралуу аталган уюмдун басма сөз кызматы билдирди.
Бул чечим Кыргызстандын президенти Садыр Жапаров менен Россиянын президенти Владимир Путиндин сүйлөшүүлөрүнүн натыйжасында макулдашылган.
Новиков фонддун кеңешинин төрагасына модернизациялоо, корпоративдик башкаруунун принциптерин чыңдоо, жаңы долбоорлорду жана ОКӨФтүн куралдары аркылуу КРнын ишкерлерин колдоого багытталган жаңы программаларды даярдоо боюнча жүргүзүлүп жаткан иштер жөнүндө айтып берди.
Максимов КРгы саясий кырдаалдын турукташуусун, ошондой эле акыркы айларда ОКӨФтүн ишмердүүлүгүн өркүндөтүү боюнча келишимдерди ишке ашырууда олуттуу жылыштар бар экендигин белгиледи. «КРгы саясий кырдаалдын турукташкандыгын эске алып, ОКӨФ тарабынан түздөн-түз каржылоо программасынын алкагында жаңы насыяларды берүүнү кайрадан баштоого болот деп эсептейм», – деди ал.
Мындан тышкары, алар ОКӨФтү модернизациялоо боюнча жумуштарды тездетүү, фонддун кеңешинин кезектеги жыйынын өткөрүү, ошондой эле кыргыз экономикасын өнүктүрүү, калкты иш менен камсыз кылуу жана өлкөнүн эл аралык рыноктогу позициясын бекемдөө тууралуу кеп кылышты.
