КРда буудайдын баасы бир жылда 40%га көтөрүлдү
Республикада буудайдын баасы бир жылдын ичинде дээрлик 40%га жогорулады. Бул тууралуу Улутстатком билдирди.
Улуттук статистика комитети тарабынан республиканын 18 калктуу конушу боюнча жүргүзүлгөн, негизги социалдык маанилүү продуктулардын орточо керектөө бааларынын ар күндүк мониторингинин жыйынтыктары, июль айына карата абалы боюнча буудай орточо эсеп менен 29.15 сомду түзгөн. Бул өткөн жылдын ушул күнүнө салыштырмалуу 8.2 сомго же 39.3%га өскөнүн көрсөттү.
Үстүбүздөгү жылдын июль айында мурунку айга салыштырмалуу республикадагы буудайга чекене баа 3.4 сомго же 13.1%га жогорулады.
Июль айында буудайга болгон баанын мурунку айга салыштырмалуу кыйла кымбаттаганы Токтогул шаарында (47.1%) жана Нарында (43.0%) катталган.
