Бюджеттен 480 млн сом бергиле, врачтарга беребиз – Саламаттыкты сактоо министри
Бүгүн, 19-октябрда, Бюджет жана финансы боюнча комитетинин жыйынында Саламаттыкты сактоо министри Алымкадыр Бейшеналиев бюджеттен министрликтин социалдык фондуна 480 млн (5 млн 650 миң доллар) жана «кызыл зонада» иштеген врачтарга 100 млн сом (1 млн 200 миң доллар) сурады. Кошумча алардын сентябрь айындагы айлык акысы бериле электигин айтты.
Кошумчалай кетсек, министр Алымкадыр Бейшеналиев комитетте министрликтин тескемесин жардамчысынын жардамы менен такалып жатып окуду.
Депутат Тариел Жоробеков министрге медициналык кызматкерлерге убагында компенсация төлөнбөй жаткандыгын айтып, бир топ суроолорду берип, 480 млн сом кайсы жака кетерин сурады.
Министр 280 млн сом карыз бар экендигин, алынуучу каражат августтан баштап 2022-жылдын январына чейин бериле тургандыгын, 243 млн сомдун 230 млн сому берилгендигин, учурда министрликтин бюджетинде 13 млн сом бар экенин билдирди.
Тариел Жоробеков бардык документтерди бүтүрүп бергенине карабай, медициналык кызматкерлер компенсация ала албай жүрүшкөнүн айтты.
«Сиз дайыма ушинтип жооп бересиз. Министр катары айткан убадаларыңызды аткара элексиз. Жетекчилик кызматта турганда жоопкерчилик болуш керек, айтылган сөздү аткарыш керек. 2020-жылы ноябрда ооруган медиктер 2021-жылы 1-июнда сиз айтып жаткан документтердин баарын бүтүрүп берген, андан бери 5 ай болду, эмнеге берилбей жатат? Кудайды карап калп айтпайсыңарбы? Акча бар экен, өзүңөрдүн коллегаңарды аяп, убагында берип койсоңор болбойбу», – деди ал.
Саламаттыкты сактоо министри бүгүн эле жыйын өткөрүп, ким ката кетиргенин табууга сөз берди.
Бюджеттен суралган 480 млн сомду берүүнү комитетте бир добуштан колдоп беришти.
Кошумча окусаңыз болот:
Министр-бизнесмен – Саламаттык сактоо министри Алымкадыр Бейшеналиев кандай бизнестерге ээлик кылат?
