Былтыр Кыргызстан менен Пакистандын соода жүгүртүүсү 16 млн доллардан ашкан
Былтыркы жылдын жыйынтыгы боюнча Кыргызстан менен Пакистандын ортосундагы соода жүгүртүүнүн көлөмү 16 млн доллардан ашты. Бул тууралуу Экономика жана коммерция министрлигинин Тышкы байланыш башкармалыгынын башчысы Улукман Максүтов “Биринчи радионун” түз эфиринде билдирди.
Анын маалыматына ылайык, 2021-2025-жылдар аралыгында эки өлкө ортосундагы товар жүгүртүү дээрлик эки эсеге өскөн.
Импорттун негизги бөлүгүн фармацевтикалык продукциялар түзөт. Ал эми Кыргызстандын Пакистанга болгон экспорту негизинен айыл чарба продукцияларынан турат. Учурда кайра иштетилген айыл чарба товарларын экспорттоону кеңейтүү боюнча иштер жүрүп жатат.
Максүтовдун айтымында, Пакистан кыргыз буурчагына жана пиязына кызыгуу билдирген. Бул багытта тиешелүү сүйлөшүүлөр жана уюштуруу иштери улантылууда.
