Кыргызстанга тыштан 2 млрд кВт/с электр энергиясы керек
Күз-кыш мезгилин өткөрүүгө Кыргызстанга 2 млрд кВт/с жакын электр энергиясын импорттоо керек. Бул тууралуу министрлер кабинетинин төрагасынын орун басары Азиз Аалиев кечээ, 20-октябрда Жогорку Кеңештин жыйынында билдирди.
Анын айтымында, бул чыгымдарды жабуу үчүн каржы булактары бар. Аалиев, министрлер кабинети Казакстан, Орусия, Түркмөнстан, Өзбекстан менен электр энергиясын алуу боюнча ыкчам сүйлөшүүлөрдү жүргүзүп жатканын кошумчалады. Түркмөнстан менен келишимдердин алкагында 500 млн кВт/с электр энергиясы импорттолот.
Ал белгилегендей, 1-октябрда суунун аздыгынан Токтогул суу сактагычындагы суунун көлөмү 12.3 млрд куб метрди түзгөн, бул өткөн жылга салыштырмалуу 2.9 млрд кубга аз.
«Бул республиканын энергетикалык системасы үчүн белгилүү бир тобокелчиликтерди жаратат, анткени күз-кыш мезгилинде биз электр энергиясын өндүрүү үчүн болжол менен 7-8 млрд куб метр сууну колдонобуз жана жылытуу мезгилинин жыйынтыгы боюнча суунун деңгээли «өлүк көлөмгө» түшпөш керек», – деди ал.
