2021-жылдын III кварталында республикадагы депозиттердин жалпы көлөмү 215 млрд сомду түздү
2021-жылдын III кварталынын жыйынтыгы боюнча республикадагы депозиттердин жалпы көлөмү 215 млрд сомдон ашты. Бул тууралуу Депозиттерди коргоо агенттигинин аткаруучу директору Эркебей Мурзабеков «Биринчи радиого» берген маегинде айтты.
Анын айтымында, 2020-жылдын аягындагы жалпы депозиттердин көлөмү 184 млрд сомду түзгөн. Ал эми 2021-жылдын III кварталынын жыйынтыгы боюнча 215 млрд сомдон ашты.
«2015-жылдан тарта ортоломо 15-20%дын деңгээлинде өсүү берип жаткан болсо, 9 айдын жыйынтыгы боюнча 17%га жеттик. Алдыдагы дагы 3 айды кошо турган болсок, буга чейин өсүп келе жаткан тенденция уланат деген ишеничтебиз. Бул биринчиден, элдин турмуш-деңгээли бир аз да болсо жогорулап жатат дегенди билдирет, экинчи жагынан болсо, калк топтогон каражаттарын банк системасына ишенип тапшырып жатканынан жана финансылык сабаттуулугунун жогорулап жатканынан кабар берет», – деди ал.
