Бишкекте 22 млн сом алдап алган жарандар кармалды

Бишкек ШИИББи эки шектүүнү кармады. Алар тергөөнүн версиясы боюнча Бишкек шаарынын тургунун алдоо жолу менен ири суммадагы акчасынан ажыраткан.

Милициянын маалыматына караганда, 2025-жылдын 22-декабрында Свердлов райондук ички иштер башкармалыгына Ч.Г. аттуу жаран кайрылган.

Анын айтымында, өздөрүн УКМКнын, ИИМдин жана Улуттук банктын кызматкерлери катары тааныштырган белгисиз адамдар аны банкомат аркылуу акчасын банктык картага которууга көндүрүшкөн. Натыйжада келтирилген зыяндын суммасы 22 млн 130 миң сомду түзгөн.

Бул факт боюнча КР Кылмыш-жаза кодексинин "Алдамчылык" беренеси менен кылмыш иши козголгон.

Ыкчам-издөө иш-чараларынын жүрүшүндө шектүүлөр — 2002-жылы туулган Т.Ж. жана 2006-жылы туулган К.Э. аныкталып, кармалды. Алар Тергөө кызматына жеткирилип, убактылуу кармоочу жайга киргизилди.

Учурда башка адамдардын катыштыгы бар-жогу текшерилип, кылмыштын бардык жагдайлары такталууда.

Бишкек ШИИББ эскертет: мамлекеттик органдардын кызматкерлери эч качан жарандардан акчаны банктык картага которууну же телефон аркылуу жеке маалыматтарды берүүнү талап кылбайт.