Баткенде мыйзамсыз сыртка чыгырылып бараткан 10 баш торпок кармалды
Мамлекеттик чек ара кызматынын Баткен чек ара отрядынын аскер кызматкерлери мамлекеттик чек ара аркылуу ири мүйүздүү малды мыйзамсыз өткөрүү аракетин алдын алышты.
Маалыматка ылайык, Ак-Татыр айылында чек арачылар Кыргызстан жаранын кармашкан. Анын Mercedes-Benz Sprinter үлгүсүндөгү унаасынан 10 баш торпок табылган. Ал жаныбарларды расмий өткөрмө бекеттеринен тышкары жол менен коңшу мамлекеттин аймагына айдап өтүүнү пландаган.
Чек арачылар кармалган жаранды жана малды Чек ара кызматынын бөлүмүнө жеткиришкен. Учурда териштирүү иштери жүргүзүлүп, тиешелүү документтер таризделүүдө.
Мамлекеттик чек ара кызматы эскертет: чек ара режимин бузгандыгы жана товарларды же жаныбарларды мыйзамсыз өткөргөндүгү үчүн мыйзамга ылайык катуу жоопкерчилик каралган.
Мындан тышкары, Кыргызстанда малды сыртка чыгарууга тыюу салынган. Бул чара ички рынокто эттин баасын турукташтыруу максатында киргизилген.
