«Альянс Алтын» каржылаган «Бакубат Талас» фонду таластыктарды көмүр менен камсыздоого жарым млн сом берди
«Альянс Алтын» каржылаган «Бакубат Талас» фонду таластыктарды көмүр менен каржылоого кайтарымдуу негизде жарым млн сом берди. Бул тууралуу Талас ыйгарым укуктуу өкүлчүлүгү билдирди.
Өкүлчүлүктүн айтымында, калкты арзан көмүр менен камсыз кылуу демилгесин облус башчысы Бакытбек Нарбеков көтөрүп, бул үчүн «Бакубат Талас» фондунан жеке ишкерге 557 миң 500 сом кайтарымдуу каражат бөлүнүп берилген. Ишкер менен эки тараптуу келишим түзүлүп, ага ылайык, 2022-жылдын 11-апрелине чейин Кара-Кече көмүр кенинен көмүр отунун ташып келүү иштери жеке ишкерлер тарабынан жүргүзүлмөкчү.
Алынып келинген көмүр тоннасы 4000 миң сомдон ашпаган баада бир кардарга 500 килограммдан чектөө менен сатуу жагы каралууда.
Мындан тышкары, Казакстан Республикасынын Тараз шаарынан көмүр отунун алып келүү боюнча тийиштүү иш чаралар уюштурулууда. Эки тараптуу сүйлөшүүлөрдүн натыйжасында жакынкы арада Казакстандан 100 тонна көмүр Талас облусуна келүүсү күтүлүүдө.
Көмүр ташып келүүгө, мамлекеттик мекемелердин жана айыл өкмөттөрдүн балансындагы автоунаалар тартылды. Ал эми, сапарга чыккан айдоочулардын коопсуздугун камсыз кылуу максатында аларды Талас облустук өзгөчө кырдаалдар министрлигинин кызматкерлери коштоп барууда дейт Талас ыйгарым укуктуу өкүлчүлүгү.
Эскерте кетсек, ушул эле фонддун каржылоосу менен жакында кийим тигүү цехи ишке кирген. Аталган кийим тигүүчү цехке «Бакубат Талас» фонду жалпысынан 900 миң сом каражат жумшаган.
