Бюджеттин киреше бөлүгүн салык жана бажы системасын толук санариптештирүү аркылуу жогорулатабыз – Акылбек Жапаров
Жакын арада бюджеттин киреше бөлүгүн салык жана бажы башкаруу тутумун толук санариптештирүү жолу аркылуу жогорулатууну көздөп жатабыз. Бул тууралуу Министрлер Кабинетинин төрагасы Акылбек Жапаров Евразиялык өкмөттөр аралык кеңешинин алкагында Россия Федерациясынын Өкмөтүнүн Төрагасы Михаил Мишустин менен жолугушуу учурунда айтты.
Тараптар салык жана бажы органдарынын ишин санариптештирүү, анын ичинде салык башкаруу тутумун техникалык жана программалык өнүктүрүү боюнча маселени талкуулады.
«Биз «жакыр» өлкө синдромунан баш тартуудабыз жана колдогу бардык жеке ресурстарды пайдаланууга умтулабыз. Биз үчун Россия Федерациясынын салык жана бажы процедураларын фискалдаштыруудагы тажрыйбасы абдан маанилүү. Жакын арада бюджеттин киреше бөлүгүн салык жана бажы башкаруу тутумун толук санариптештирүү жолу аркылуу жогорулатууну көздөп жатабыз», – деди Жапаров.
Пикир алышууда тараптар ошондой эле гуманитардык тармактагы эки тараптуу мамилелерди чыңдоонун маанилүүлүгүн белгиледи. Атап айтканда, КРда 2019-жылдан бери ийгиликтүү ишке ашырылып келе жаткан «Чет жердеги Россиялык мугалим» долбоору жана өлкөдө 2022-жылдан тарта 9 жалпы билим берүүчү уюмдардын курулушу маселеси талкууланды.
Михаил Мишустин РФнын аймагында жүргөн КРнын жарандарына алдыдагы парламенттик шайлоодо добуш берүүсү үчүн шайлоо участокторун уюштурууга көмөк көрсөтүүгө даяр экендигин билдирди, ошондой эле кыргыз тарапка Бишкек, Ош шаарлары жана Ысык-Көл облусу менен аба катнашынын кайра жанданышы тууралуу маалымат берди.
Мындан тышкары, Өкмөт башчылар соода-экономикалык, илимий-техникалык жана гуманитардык кызматташтык боюнча өкмөттөр аралык комиссиясынын алкагындагы биргелешкен ишти жана Россия-Кыргыз өнүктүрүү фондунун ишин активдештирүү маселесин талкуулады.
