Электрондук тамекилерге коюлган салыктын туура эмес ставкаларынан улам бюджетке 150-170 млн сом түшпөй калышы мүмкүн
Жылытылган тамеки продукцияларына коюлган салыктын ставкалары тамекиге болгон салыктын ставкаларына теңелбесе, бюджетке 150-170 млн сом түшпөй калышы мүмкүн. Бул тууралуу кечээ, 23-ноябрда ЖКнын Экономикалык жана фискалдык саясат боюнча комитетинин жыйынында Базар, соода жана кызмат көрсөтүүлөр ассоциациясынын жетекчиси Артур Ташибеков билдирди.
Анын айтымында, мурда Экономика министрлиги тамекинин даана эсебине макул болсо, азыр килограмм менен эсепти жүргүзүүнү каалап жатат.
«Мен жарандардын ден соолугун тамекинин жана аны керектөөнүн зыяндуу таасиринен коргоо боюнча мыйзамга өзгөртүүлөрдү иштеп чыгуу боюнча жумушчу топтун курамында болгом. Депутаттар жана мамлекеттик органдар менен биргеликте биз бардыгын иштеп чыктык, мындай продукцияга концептуалдык аппарат бердик. Эми биз башкача эсептешибиз керек деп жатабыз. Кеп электрондук системалар үчүн мини-тамекилер жөнүндө болуп жатат. Бул жерде килограмм жок. Ар кандай пакеттер ар кандай салмакта. Туура эмес башкаруудан улам зыян келтирилет», — деди Ташибеков.
