Евробиримдик Кыргызстанга 62 млн евро грант берет
Евробиримдиги Кыргызстан менен 2021-2027-жылдарга кызматташуунун жаңы көп жылдык индикативдик программасын кабыл алды. Анын алкагында, биринчи төрт жылда Евробиримдик КРга санариптештирүү жана аны башкаруу, адамдык өнүгүү, жашыл климат, ошондой эле туруктуу экономика үчүн грант түрүндө 62 млн евро бөлөт. Бул тууралуу Евробиримдиктин КРдагы өкүлчүлүгүнөн билдиришти.
«Бүгүн биз башкаруу, санариптештирүү, билим берүү тармактарында эки тарапты кызыктырган чөйрөлөрдө узак мөөнөттүү колдоо көрсөтүүгө милдеттенип, кызматташуубуздагы жаңы кадамды баштадык. Жаңы көп жылдык программа Евробиримдиктин кыргыз элине туруктуу колдоосунун далили болуп саналат», – деди делегациянын башчысы Эдуард Ауэр.
Ошол эле учурда 2025-2027-жылдарга программа боюнча каржылоо анын 2024-жылы аткарылышына сереп салыынган соң аныкталат.
Белгилей кетсек, 2014-2020-жылдар үчүн кызматташуунун мурунку көп жылдык индикативдик программасынын бюджети 174 млн еврону түзгөн, анын артыкчылыктуу багыты социалдык коргоо тармагындагы реформаларды колдоо болгон.
