«Кыргыз темир жолу» ишканасы «Алтайвагон» ААКдан сатып алган жүк ташуучу вагондордун биринчи партиясын алды. Калган вагондор 2022-жылдын биринчи кварталында келээри күтүлүүдө. Бул тууралуу өкмөттүн басма сөз кызматы билдирди.

Министрлер Кабинетинин төрагасынын орун басары Азиз Аалиев «Бишкек-1» темир жол станциясында өлкөгө 10 вагондун алынып келишине байланыштуу өткөн иш-чаранын жүрүшүндө «Кыргыз темир жолу» транспорттук жана азык-түлүк коопсуздугун камсыздоо курамында маанилүү элемент болуп саналаарын айтты.

Анын айтымында, дээрлик бардык жүк ташуу токтотулган пандемия учурунда, «Кыргыз темир жолу» ташуулардын көлөмүн жогорулата алган жана коңшу өлкөлөрдөн жүк транзитин камсыздаган жалгыз ишкана катары саналган.

«Жакынкы жылдары чоң реформалар жүргүзүлөт. Биз Кытай – Кыргызстан – Өзбекстан жаңы темир жол магистралын куруу долбоору үстүндө иштөөдөбүз, бул ишкананын эл аралык деңгээлге чыгуусуна жана эл аралык жүктөр үчүн транзиттик коридорду камсыздоого мүмкүндүк берет. Балыкчы – Кочкор – Кара-Кече темир жолун куруу боюнча иштер жүрүүдө», – деди Азиз Аалиев.