«Таатан» соода борборунда ишкерлердин 45%дан ашыгы контролдук-кассалык машиналарды (ККМ) колдонушат. Бул тууралуу Салык кызматынын маалымат кызматы билдирди.

Мамлекеттик салык кызматы «Таатан» соода-базар комплексинин ишкерлеринин ККМди орнотууга жана колдонууга каршы кечээки митинги боюнча төмөндөгүлөрдү билдирет.

Бишкек шаарында жайгашкан «Таатан» соода борборунда 208 ишкердик субъект иштейт.

Мыйзамга ылайык, «Таатандагы» ишкерлер 2021-жылдын 1-июлунан тартып жаңы стандарттарга жооп берген ККМди колдонууга милдеттүү. Ал эми 20 чарчы метрге чейинки соода аянтчасы бар соода түйүндөрү үчүн ККМди колдонуу мөөнөтү 2022-жылдын 1-апрелинен тартып белгиленген.

Берилген маалыматка ылайык, 2021-жылдын 23-декабрына карата 208 субъекттин ичинен KKM- онлайн 95инде (45.6%) орнотулган. Калган ишкерлер боюнча KKM-онлайн орнотуу иштери жүргүзүлүүдө.

Эскерте кетсек, кечээ, 22-декабрда «Таатандагы» ишкерлер митингге чыгышкан болчу. Алардын айтымына караганда, ишкерлер товарларды карызга алып, акчасын кийин төлөшөт. Эгер ККМ коюлса салык үстүнө кошулган акчадан эмес, товардын толук суммасынан алынаарын айтышып, ККМди колдонуудан баш тартышкан.

Салык органдарынын кызматкерлери тарабынан KKMди колдонуунун тартиби жана эрежелери тууралуу түшүндүрүү иш-чараларынын жүрүшүндө «Таатандын» ар бир соодагерине керектүү маалыматтар жеткирилген. Ошол эле учурда субъекттер эч кандай түшүнбөстүктөр жана каршы пикирлерин билдирбегенин СК кабарлады.

«Тилекке каршы, учурда айрым адамдар салык мыйзамдарынын ченемдерин аткаруу жөнүндө мыйзамдын талаптарын бүтүндөй бизнеске кысым жасоо катары көрсөтүүгө аракет кылып жатышат. Атап айтканда, кечээки митингдин катышуучулары жеке кызыкчылыктарын коомдук кызыкчылыктардан жогору коюп, атайылап коомчулукту үгүттөп, адаштыруу аракетин кылып жатканы айдан ачык.

Белгилей кетсек, ККМди орнотуу жана колдонуу мезгилдин заманбап талаптарына жана өлкөнүн бүтүндөй калкынын жана бүтүндөй мамлекеттин кызыкчылыктарына жооп берет», – дейт СК.

• Учурда ККМдин эки түрү колдонулуп жатат – аппараттык жана программалык. Смартфонго, планшетке жана компьютерге программалык ККМди жүктөө акысыз ишке ашырылат, бул аппараттык ККМдын кыйла жеткиликтүү альтернативасы болуп саналат. Ишкер болгону чекти керектөөчүгө берүү үчүн чек чыгаруучу принтерди гана сатып алат.