Эскерте кетсек, социалдык түйүндөрдө Кара-Кече көмүр кенинде көмүр ташуучулар менен «Альфа» атайын күчтөрүнүн ортосунда жаңжал чыгып, кээ бир айдоочулар жаракат алганы тууралуу маалымат тараган болчу. Буга байланыштуу УКМК Кара-Кечедеги абалга комментарий берди.

УКМКнын берген маалыматына ылайык, «Кара-Кече» көмүр филиалынан көмүр алуу кезегин күтүп жаткан айдоочулар арасында чагымчыл адамдардын иш аракеттеринин натыйжасында келишпестиктер болуп, УКМКнын «Атайын кызматынын» кызматкерлери айдоочулар ортосунда болгон жаңжалды жөнгө салган.

Ошол эле күнү жергиликтүү бийлик жана күч органдары тарабынан айдоочуларга түшүндүрүү иштери жүргүзүү учурунда, айдоочулар «Атайын кызматтын» кызматкерлеринин коопсуздукту сактоо ишин улантышын суранышкан.

Учурда абал туруктуу, «Кара-Кече» көмүр филиалынан көмүр алуу иштери жүрүүдө, азыркы тапта бул иш боюнча укук коргоо органдары жеринде иштеп жатат деп билдирет УКМК.